नाशिक : ‘महाराष्ट्राचा फेवरेट कोण?’ सुवर्णदशक सोहळा नुकताच मराठी-हिंदी सिनेसृष्टीतील मान्यवरांच्या साक्षीने दिमाखात संपन्न झाला. सुवर्णदशक सोहळ्याची सुवर्णझळाळी आणि मराठमोळ्या ग्लॅमरचा जबरदस्त जलवा रसिकांना या सोहळ्यात अनुभवायला मिळणार आहे.
‘महाराष्ट्राचा फेवरेट कोण?’ सुवर्णदशक पुरस्कार सोहळ्यासाठी हॅालच्या गेटवर उभारलेली सुवर्णदशक सोहळ्याच्या ट्रॉफ़ीची आकर्षक प्रतिकृती आणि तिथलं एकूणच वातावरण अत्यंत ग्लॅमरस व भारावून टाकणारं होतं. नामांकनं मिळालेल्या सर्वांच्याच मनात सुवर्णदशक सोहळ्यातील पुरस्कारावर कोणाचं नाव कोरलं जाणार? याची उत्सुकता होती. अखेर पुरस्कार सोहळा संपन्न झाला आणि खऱ्या अर्थानं महाराष्ट्राचे फेवरेट असणाऱ्या कलाकार, गायक, गायिका, संगीतकार, दिग्दर्शकांनी विजेतेपदाचा मान पटकावला. ‘महाराष्ट्राचा फेवरेट कोण?’ची ट्रॅाफी अभिमानानं मिरवत विजेत्यांनी आपलं मनोगत व्यक्त केलं. यावेळी काहींचा आनंद गगनात मावेनासा झाला, तर काहीजण भावूक झाले. खुमासदार सूत्रसंचालन, खोचक बुलेटीन, धडाकेबाज परफॅार्मंसेस, निरनिराळे स्कीट्स, आगामी चित्रपटांचं प्रमोशन आणि आशीर्वादरूपी दिग्ग्जांचा करण्यात आलेला सन्मान याने ‘महाराष्ट्राचा फेवरेट कोण?’ची रंगत उत्तरोत्तर वाढतच गेली. मराठी सिनेसृष्टीतील तारे-तारका आणि तंत्रज्ञांसोबत बॅालिवूडमध्ये ‘शो मॅन’ म्हणून ओळखले जाणारे सुभाष घई, तसंच हिंदी सिनेसृष्टीत यशस्वी असलेला मराठमोळा अभिनेता रितेश देशमुखही या सोहळ्याला आवर्जून उपस्थित होता.
शुभकार्याची सुरुवात गणेशवंदेनेनं करण्याची भारतीय परंपरा आहे. या परंपरेनुसार कोणत्याही पुरस्कार सोहळ्याची सुरुवात गणेश वंदनेनं केली जाते. महाराष्ट्राची लाडकी अप्सरा सोनाली कुलकर्णी आणि एनर्जेटिक अभिनेता सिद्धार्थ जाधव यांनी गणेश वंदनेसाठी निवडलेल्या गाण्यांवर धडाकेबाज परफॅार्मंस सादर केला. कोकणात झालेल्या विमानतळाच्या पार्श्वभूमीवर पौराणिक व्यक्तिरेखांच्या माध्यमातून तयार करण्यात आलेलं प्रासंगिक प्रहसन चांगलंच रंगलं. यात महाभारतातील धृतराष्ट्र, दुर्योधन, शिखंडी यांसारख्या काही व्यक्तिरेखांच्या तसेच अरब, चायनीज नागरिकांच्या अवताराच्या माध्यमातून हे स्कीट पहायला मिळेल. भारत गणेशपुरे, अभिजीत चव्हाण, सुनील तावडे, रोहित चव्हाण, अंकुर वाढवे आदी कलाकारांनी या स्कीटच्या माध्यमातून उपस्थितांना हसवलं.
‘महाराष्ट्राचा फेवरेट कोण?’ या दिमाखदार सोहळ्याची आपली काही वैशिष्ट्ये आहेत. सुवर्णदशक सोहळ्याचं खास आकर्षण म्हणजे यात मराठी सिनेउद्योगासाठी उल्लेखनीय ठरलेल्या मागील दहा वर्षांमधील आठवणींना उजाळा देण्यात आला. या निमित्तानं बरेच जण दहा वर्षांमध्ये आपण केलेल्या वाटचालीच्या आठवणीत रमले. अनोखं सूत्रसंचालन हे ‘महाराष्ट्राचा फेवरेट कोण?’चं खास आकर्षण असल्यानं त्याकडं सर्वांचंच लक्ष लागलं होतं. महेश मांजरेकर यांनी सुरू केलेल्या अनोख्या व खुमासदार शैलीतील सूत्रसंचालनाची परंपरा अनेक वर्षांनंतर आजही सुरू आहे. १४ वर्षांपूर्वी झालेल्या पहिल्या ‘महाराष्ट्राचा फेवरेट कोण?’ या सोहळ्याच्या आठवणी आजही अनेकांच्या मनात ताज्या आहेत. त्या आठवणींनाही सुवर्णदशक सोहळ्याच्या निमित्तानं उजाळा मिळाला. पहिल्या ‘महाराष्ट्राचा फेवरेट कोण?’ पुरस्कार सोहळ्यात मांजरेकरांनी आपल्या अनोख्या शैलीत कलाकारांच्या गुण-अवगुणांवर मिश्किल शैलीत भाष्य करत बोट ठेवलं होतं. सूत्रसंचालनातील गंमत आणि परंपरा सुवर्णदशक सोहळ्यातही कायम होती. सुवर्णदशक सोहळ्यात मांजरेकरांनी पुन्हा आपलं बुलेटीन सादर करत मागील वर्षांतील आठवणींना उजाळा दिला. मांजरेकरांनी दाखवलेल्या वाटेनं जात आज ‘महाराष्ट्राचा फेवरेट कोण?’च्या मुख्य सूत्रसंचालनाची जबाबदारी स्वप्नील जोशी आणि अमेय वाघ या दोन हरहुन्नरी अभिनेत्यांनी सांभाळली आहे. दोघांमधील तू तू मैं मैं, खेचाखेची, चढाओढ, विनोद सारं काही भन्नाट जमलं आहे. वर्षा उसगांवकर, किशोरी शहाणे, वैभव तत्ववादी, ईशा केसकर यांच्या बहारदार सादरीकरणाने उपस्थितांची मने जिंकली. त्यानंतर अमेयच्या जोडीला वैदेही परशुरामी आणि ललित प्रभाकर आले आणि तिघांनी मिळून ‘झोंबिवली’ या आगामी चित्रपटातील गाण्यावर डान्स केला. सुभाष घई यांच्यासह सुबोध भावे, पूजा सावंत, सुशांत शेलार यांनी आपल्या ‘विजेता’ चित्रपटाच प्रमोशन यावेळी केलं. या सोहळयासाठी ज्येष्ठ अभिनेत्री सुलोचनादिदी, रमेश देव, सचिन पिळगावकर, अंकुश चौधरी, अलका कुबल, अशोक शिंदे, मृणाल कुलकर्णी, तेजस्विनी पंडीत, पूजा सावंत, नागराज मंजुळे, प्रवीण तरडे, विजय पाटकर, जयवंत वाडकर क्रांती रेडकर, आकाश ठोसर, केतकी माटेगावकर, आर्या आंबेकर अशी अनेक कलाकार मंडळी उपस्थित होती. हा नेत्रदिपक सोहळा लवकरच झी टॅाकीजवर प्रसारीत होणार आहे.
या सोहळयाविषयी बोलताना ‘झी’च्या मराठी मुव्ही क्लस्टरचे चीफ चॅनेल ऑफिसर श्री.बवेश जानवलेकर सांगतात, ‘महाराष्ट्राचा फेवरेट कोण?’ सोहळयाचे रसिकांच्या मनात एक वेगळं स्थान आहे. ते स्थान अबाधित राखण्याचा आमचा कायमच प्रामाणिक प्रयत्न राहिला आहे. या वर्षी सुवर्णदशक सोहळा सादर करतानाही हिच भावना आमच्या संपूर्ण टिमच्या मनात होती. मला विश्वास वाटतो तो विश्वास सार्थ ठरविण्याचा आम्ही यावर्षीही जोरदार प्रयत्न केला आहे.’
