मतदानाचा टक्का वाढविण्यासाठी विद्यार्थ्यांचे पालकांना पत्र : जिल्हाधिकारी सूरज मांढरे

नाशिक दि.12- विधानसभा सार्वत्रिक निवडणुकीच्या अनुषंगाने मतदानाचा टक्का वाढविण्यासाठी माझ्या भविष्यासाठी मतदान करा! या उपक्रमाच्या माध्यमातुन मुलांनी आपल्या पालकांना पत्राच्या माध्यमातून मतदान करण्याचे आवाहन करण्यात येत आहे, अशी माहिती जिल्हाधिकारी तथा जिल्हा निवडणूक अधिकरी सूरज मांढरे यांनी दिली.
जिल्हाधिकारी कार्यालयातील मध्यवर्ती सभागृहात सर्व निवडणूक निरीक्षक व खर्च निरीक्षक यांच्या बैठकीत ते बोलत होते. यावेळी पोलिस निरीक्षक अजयकुमार चौधरी, रोहित शर्मा, बी. एच. तलाटी, व्यंकटेशपथी एस, करुमांची संध्याराणी, रणजितकुमार जे., बी. रामा राव, एम. रामा राव, प्रसन्नकुमार जेना, पोलिस आयुक्त विश्वास नांगरे-पाटील, मुख्य कार्यकारी अधिकारी भुवनेश्वरी एस., पोलीस अधिक्षक (ग्रामीण) डॉ. आरती सिंग, अपर जिल्हाधिकारी निलेश सागर, निवासी उपजिल्हाधिकारी भागवत डोईफोडे, निवडणुक उपजिल्हाधिकारी कुंदन सोनवणे उपस्थित होते.
श्री. मांढरे म्हणाले, लोकसभा निवडणुकीच्या काळात ‘वोटकर नाशिककर’या मोहिमेच्या माध्यमातून 52 वर्षातील सर्वाधिक मतदानाचा विक्रम नोंदविला आहे. विधानसभा निवडणूकीच्या कालावधीत मतदानाचा टक्का वाढविण्यासाठी विविध उपक्रमांचे आयोजन करण्यात येत आहे.
मतदारसंघनिहाय प्राप्त झालेल्या तक्रारींवर तात्काळ कार्यवाही करण्यात आली असून उपजिल्हा निवडणुक अधिकाऱ्यांकडून वेळोवेळी अहवाल मागविला जात आहे. 67 स्थायी निगराणी पथकाचे सदस्य 24 तास कार्यरत असून पथकाच्या प्रमुखाला कार्यवाही करण्यासाठी कार्यकारी दंडाधिकारी यांचे अधिकार देण्यात आले आहेत. सर्व मतदान केंद्रावर आवश्यक सुविधा उपलब्ध करून देण्यात येत आहे.
पोलिस कर्मचाऱ्यांच्या कामकाजाचे नियोजन करून आवश्यकतेनुसार अतिरिक्त मनुष्यबळ उपलब्ध करून देण्यात येत आहे. भरारी पथकांच्यामार्फत निवडणूकीच्या पार्श्वभूमीवर योग्यती कार्यवाही करण्यात येत असून पोलिस विभागाकडून निवडणूक कालावधीत शस्त्रसाठा जप्त करण्यात आला असल्याची माहिती पोलिस आयुक्तांनी दिली.
सदर बैठकीसाठी सर्व निवडणूक निरीक्षकांचे संपर्क अधिकारी व नोडल अधिकारी उपस्थित होते.