महाराष्ट्राचे खेळाडू चांगली कामगिरी करतील – डॉ. उदय डोंगरे, संघ व्यवस्थापक 
नाशिक :- दिनांक ३ जुलै ते १० जुलै दरम्यान इटली येथे जागतिक आंतरविद्यापीठ क्रीडा स्पर्धांचे आयोजन करण्यात आले आहे. या क्रीडा स्पर्धेत समावेश असलेल्या तलवारबाजी खेळाच्या स्पर्धा दिनांक ६ ते ९ जुलै रोजी होणार आहेत. या स्पर्धेत नाशिकची रोशनी मुर्तडक. कोल्हापूरची ज्योती सुतार आणि औरंगाबादचा तुषार आहेर या महाराष्ट्राच्या तीन खेळाडूंचा समावेश झाला आहे, तर संघाचे व्यवस्थापक म्हणून औरंगाबादचे डॉ. बाबासाहेब आंबेडकर मराठवाडा विद्यापीठाचे क्रीडा संचालक डॉ. उदय डोंगयांची संघ व्यवस्थापक म्हणून नेमणूक झाली आहे. या स्पर्धेत रोशनी मुर्तडक ही ईपी या प्रकारात स्पर्धा करणार आहे, तर ज्योती सुतार आणि तुषार आहेर हे दोन खेळाडू सॅबर या प्रकारात स्पर्धा करतील. या स्पर्धेच्या तयारीसाठी अमृतसर, पंजाब येथे या खेळाडूंचे सराव शिबीर आयोजित करण्यात आले होते. हे खेळाडू दिल्ली येथून दिनांक १ जुलै रोजी जागतिक अंतरविद्यापीठीय स्पर्धेसाठी इटली येथे रवाना झाले. या तीनही खेळाडूंनी आपल्या कौशल्याच्या आधारे अखिल भारतीय विद्यापीठीय स्पर्धेत चांगली कामगिरी करून पदकांची कमाई केली आहे. तसेच पतियाळा येथे आयोजित करण्यात आलेल्या सराव शिबीरामध्ये प्रशिक्षकानी खेळाडूंकडून चांगला सराव करून घेतला आहे. त्यामुळे हे खेळाडू इटलीतील या जागतिक आंतरविद्यापीठ तलवारबाजी स्पर्धेत चांगली कामगिरी करतील असा विश्वास संघासोबत असलेले संघव्यवस्थापक डॉ. उदय डोंगरे यांनी व्यक्त केला. या तीनही खेळाडूंचे तलवारबाजी असोसिएशनचे अध्यक्ष अशोक दुधारे, कार्याध्यक्ष प्रकाश काटोळे, क्रीडा उपसंचालक चंद्रकांत कांबळे, जिल्हा क्रीडा अधिकारी रवींद्र नाईक, छत्रपती पुरस्कार प्राप्त क्रीडा संघटक आनंद खरे. राजू शिंदे, दिलीप घोडके, शेषनारायण लोढे, राजकुमार सोमवंशी आदिंनी या खेळाडूंना शुभेच्छा दिल्या.
