नाशिक, येवला :- आशियाई विकास बँकेच्या अर्थसहाय्याने हाती घ्यावयाच्या पहिल्या टप्प्यातील नाशिक जिल्ह्यातील नाशिक-निफाड-येवला व चांदवड-लासलगांव-विंचूर रोड या रस्त्यांसाठी निधी मंजूर करण्याची मागणी राज्याचे माजी उपमुख्यमंत्री छगन भुजबळ यांनी राज्याचे सार्वजनिक बांधकाम मंत्री चंद्रकांत पाटील यांच्याकडे केली आहे. याबाबत छगन भुजबळ यांनी मंत्री चंद्रकांत पाटील त्यांच्यासोबत चर्चा केली आहे.
छगन भुजबळ यांच्या प्रयत्नामुळे आशियाई विकास बँक अर्थसहाय्यीत महाराष्ट्र रस्ते सुधारणा प्रकल्पांतर्गत पहिल्या टप्प्यातील कामांमध्ये नाशिक जिल्ह्यातील नाशिक निफाड-येवला व चांदवड-लासलगांव-विंचूर रोड या रस्त्यांचा समावेश करण्यासाठी सार्वजनिक बांधकाम विभागाने शासनाला प्रस्ताव पाठविला आहे. नाशिक-निफाड-येवला या चौपदरी रस्त्याची पिंपळस ता.निफाड ते येवला या दरम्यान अत्यंत बिकट अवस्था झालेली आहे. सदर रस्ता हा मुंबई व मराठवाड्याला जोडणारा प्रमुख रस्ता आहे. सदर रस्त्यावर अनेक ठिकाणी खड्डे पडून रस्त्याची चाळण झालेली आहे. या रस्त्याची दुरुस्ती न केल्यामुळे खड्यांमध्ये वाढ होवून मोठ्या प्रमाणात हानी होत असल्याचे त्यांनी निदर्शनास आणून दिले आहे.
त्याचप्रमाणे चांदवड-लासलगाव-विंचूर रोड हा रस्ता गुजरातकडून शिर्डीला जाणाऱ्या प्रवाशांसाठी महत्वाचा रस्ता असल्याचे भुजबळांनी चंद्रकांत पाटील यांच्या निदर्शनास आणून दिले. या दोन्ही रस्त्यांची दुरवस्था लक्षात घेऊन आशियाई विकास बँकेच्या अर्थसहाय्यातून सदर दोन्ही रस्त्यांसाठी निधी मंजूर करण्यात यावा अशी मागणी छगन भुजबळ यांनी सार्वजनिक बांधकाम मंत्री चंद्रकांत पाटील यांच्याकडे केली आहे.
