नाशिक : नाशिक जिल्हा तलवारबाजी असोसिएशनच्या वतीने आणि महाराष्ट्र तलवारबाजी असोसिएशनच्या मार्गदर्शनाखाली नाशिकच्या विभागिय क्रीडा संकुल, पंचवटी, हिरावाडी, नाशिक येथे नाशिक पूर्वचे आमदार ऍड. राहुल ढिकले यांच्या प्रमुख सहकार्याने३३ व्या वरिष्ठ गटाच्या महाराष्ट्र राज्य तलवारबाजी अजिंक्य पद स्पर्धेचे आयोजन करण्यात आले आहे. स्पर्धेत महाराष्ट्रातील २८ जिल्ह्यांचे ७६५ खेळाडू सहभागी होणार आहेत.
या स्पर्धेतील कामगिरीच्या आधारे महाराष्ट्राच्या पुरुष आणि महिला संघांची निवड करण्यात येणार आहे. हे निवड झालेले खेळाडू दिनांक २४ ते २६ मार्च दरम्यान पुणे येथे आयोजित राष्ट्रीय स्पर्धेत महाराष्ट्राचे प्रतिनिधित्व करतील. या राज्य स्पर्धेचे उद्घाटन उद्या दिनांक ३ मार्च रोजी दुपारी ४.०० वाजता गोवा राज्याचे क्रीडा मंत्री गजेंद्र गौड आणि भारतीय तलवारबाजी असोसिएशनचे अध्यक्ष माजी मंत्री सतेज पाटीलयांच्या हस्ते करण्यात येणार आहे.
या प्रसंगी प्रमुख पाहुणे म्हणून कालिका मंदिर संस्थानचे अध्यक्ष अण्णा पाटील, माजी स्थायी समिती सभापती गणेश गीते, नाशिक रोड पोलीस स्टेशनचे निरीक्षक अनिल शिंदे, जिल्हा क्रीडा अधिकारी सुनंदा पाटील, क्रीडा अधिकारी अविनाश टिळ, महाराष्ट्र तलवारबाजी असोसिएशनचे सचिव डॉ.उदय डोंगरे, क्रीडा संघटक अशोक दुधारे, आनंद खरे यांच्या प्रमुख उपस्थितीत संपन्न होणार आहे अशी माहिती आयोजन समिती प्रमुख राजू शिंदे, दीपक निकम यांनी दिली.
