नाशिक : किम्स मानवता हॉस्पिटल, नाशिक यांच्या वतीने “वर्ल्ड इमर्जन्सी मेडिसिन डे” निमित्त आयोजित करण्यात आलेली जनजागृतीपर “वॉकथॉन २०२६” उत्साहपूर्ण वातावरणात आनंदी अंगण जॉगिंग ट्रॅक येथे संपन्न झाली.
आपत्कालीन वैद्यकीय सेवा, सार्वजनिक सुरक्षितता तसेच आपत्कालीन परिस्थितीत नागरिकांनी कोणती काळजी घ्यावी याबाबत जनजागृती निर्माण करण्याच्या उद्देशाने या उपक्रमाचे आयोजन करण्यात आले होते. या वॉकथॉनमध्ये डॉक्टर, हॉस्पिटल कर्मचारी तसेच स्थानिक नागरिकांनी उत्स्फूर्त सहभाग नोंदविला.
यावेळी डॉ. शुभांगी कांबळे यांनी आपत्कालीन परिस्थितीमध्ये नागरिकांनी कोणती काळजी घ्यावी, प्राथमिक उपचाराचे महत्त्व तसेच तातडीच्या वैद्यकीय मदतीचे महत्त्व याबाबत सखोल मार्गदर्शन केले.
तसेच डॉ. मानसी गुजराथी यांनी “Fat to Fit या विषयावर मार्गदर्शन करत निरोगी जीवनशैली, वाढते लठ्ठपण आणि त्यावरील उपाययोजना याविषयी माहिती दिली. याच प्रसंगी मान्यवरांच्या हस्ते किम्स मानवता हॉस्पिटलच्या “ओबेसिटी क्लिनिक” चे उद्घाटन करण्यात आले.
कार्यक्रमादरम्यान सहभागी नागरिकांना बक्षीस वितरण करण्यात आले. तसेच किम्स मानवता हॉस्पिटलच्या आपत्कालीन विभागातील डॉक्टर व कर्मचाऱ्यांनी आपत्कालीन परिस्थितीत नागरिकांनी काय करावे यावर आधारित पथनाट्य सादर केले. यामध्ये CPR (सीपीआर) चे प्रात्यक्षिकही दाखविण्यात आले, ज्यास उपस्थित नागरिकांकडून उत्स्फूर्त प्रतिसाद मिळाला.
यावेळी संगीतमय योगा ग्रुपच्या प्रणेत्या डॉ. मनीषा कापडणीस म्हणाल्या, “नियमित व्यायाम, योग आणि आरोग्याविषयी जागरूकता हीच निरोगी जीवनाची गुरुकिल्ली आहे. अशा सामाजिक जनजागृती उपक्रमांची आजच्या काळात अत्यंत गरज आहे.”
तसेच किम्स मानवता हॉस्पिटलचे सीओओ डॉ. स्वानंद कुलकर्णी म्हणाले, “आपत्कालीन परिस्थितीत योग्य वेळी योग्य उपचार आणि नागरिकांची जागरूकता अनेक जीव वाचवू शकते. समाजामध्ये आपत्कालीन परीस्थिती विषयी जागरूकता निर्माण करणे ही काळाची गरज आहे.”
या कार्यक्रमास डॉ. मनीषा कापडणीस, डॉ. स्वानंद कुलकर्णी, डॉ. रोहन देव, योगा प्रशिक्षक सविता सरडे, मा. नगरसेवक अरुण नाना काळे, मा. नगरसेवक संतोष गायकवाड, रामदास निकम, राजेंद्र धामणे, वैभव काळे, अनिल सुर्वे आदी मान्यवर उपस्थित होते
