नाशिक – पाळीव प्राण्यांमधील कुत्रा, मांजर व सर्व प्रकारचे पक्षी यांच्या आरोग्याची सर्वसमावेशक काळजी घेण्यासाठी नाशिक मध्ये पहिलेच सुपरस्पेशालिटी पेट हॉस्पिटल “पेट परफेक्ट” ची सुरुवात करण्यात आली असल्याची माहिती संचालक डॉ दिग्विजय पाटील यांनी पत्रकार परिषदेमध्ये दिली. डॉ दिग्विजय पाटील गेल्या ६ वर्षापासून या क्षेत्रात असून अनेक जखमी पक्षांवर सामाजिक जाणीवेतून मोफत उपचार देखील केले आहेत.
” या हॉस्पिटलमध्ये पाळीव प्राण्यांची आरोग्य तपासणी, त्यांना होणारे आजारांवरील निदान व उपचार, शस्रक्रिया तसेच लसीकरण येथे होईल. पाळीव प्राण्यांसाठी नाशिकमधील पहिलीच रक्ताच्या तपासण्या करणारी पॅथॉलॉजी लॅब देखील या हॉस्पिटलचा महत्वाचा भाग असणार आहे.” – डॉ दिग्विजय पाटील
सध्या असलेली विभक्त कुटुंब पद्धती, वाढलेला स्क्रीन टाईम, जीवनातील ताण तणाव यामुळे घरातील पाळीव प्राणी असण्याचे अनेक सकारात्मक परिणाम दिसून आले आहेत. लहान मुले, वयस्कर व्यक्ती, घरातील स्त्रिया यांचा तो पाळीव प्राणी ख-या अर्थाने सोबती असतो असेही त्यांनी नमूद केले.
अनेक सणांमध्ये जसे संक्रांती मधील नायलॉन मांजा, रंगपंचमी मधील रासायनिक रंग. दिवाळीतील आवजी फटाके यामुळे पाळीव प्राण्यांना त्रास होतो. याकरिता नियमितपणे प्रबोधनाचे काम करण्यात येत असल्याचेही त्यांनी सांगितले. दरवर्षी साजरा होणा-या जागतिक पशुसंवर्धन दिनाच्या निमित्ताने मोफत शिबिराचे आयोजनही गत ६ वर्षापासून डॉ दिग्विजय पाटील करत आहेत.
