नाशिक – बालरोगतज्ञांची राष्ट्रीय संघटना इंडियन अकॅडमी ऑफ पेडीयाट्रिक्स च्या नाशिक शाखेतर्फे १ ऑगस्ट ते ७ ऑगस्ट दरम्यान जागतिक स्तनपान सप्ताह साजरा करण्यात येणार असून या निमित्ताने अनेक कार्यक्रमांचे आयोजन केले असल्याची माहिती नाशिक शाखेचे अध्यक्ष डॉ .संजय आहेर यांनी दिली .
ते म्हणाले कि स्तनपान हा बालकांच्या सर्वांगिण विकासाकरिता अत्यंत आदर्श आहार असून जागतिक आरोग्य संघटनेच्या निर्देशानुसार जन्मानंतर पहिल्या एका तासात बाळास पहिले स्तनपान मिळाले पाहिजे .तसेच वयाचे पहिले ६ महिने बाळांना निव्वळ स्तनपान द्यावे व सहा महिन्यानंतरच ताजा ,पोषक व घरगुती घनाहार सुरु करावा .
स्तनपानाचे बाळ व आई या दोघांसाठी अनेक फायदे असून याची जनजागृतीही या सप्ताहाच्या निमित्ताने करण्यात येणार आहे . या सप्ताहात शहरातील बिटको हॉस्पिटल ,मायको हॉस्पिटल ,सिव्हिल हॉस्पिटल ,ज्योती हॉस्पिटल ,इ एस आय एस हॉस्पिटल येथे जागृती व संवादाच्या कार्यक्रमाचे आयोजन करण्यात आले आहे .यासाठी सचिव डॉ. संदीप पाटील ,डॉ . प्रविण काळे तसेच कोषाध्यक्ष डॉ. कवीष मेहता यांच्यासहित सर्व सदस्य कार्यरत आहेत.
