निमा न्यू नाशिकच्या सहकार्याने महिलांचा सत्कार
Nashik : कुटुंबात आई, बहिण, वहिणी, पत्नी अशा विविध रुपांनी महिला ही अत्यंत महत्वाची भूमिका बजावत असते. महिलांमध्ये स्तनाचे, गर्भाशयाच्या मुखाच्या कर्करोगाचे निदान होण्याचे प्रमाण वाढले असून, सजग राहून स्त्रीशक्तीला कर्करोगाच्या विळख्यातून मुक्त करण्याचे आवाहन एचसीजी मानवता कॅन्सर सेंटरचे प्रमुख व चीफ ऑफ ऑन्कॉलॉजी ॲण्ड रोबोटिक्स सर्व्हीसेस प्रा.डॉ.राज नगरकर यांनी केले. ‘आरोग्य सहेली’ या रुग्णालयाच्या उपक्रमाची माहिती देतांना, जास्तीत जास्त चाचण्या करण्यासह लसीकरणावर भर देण्याची आवश्यकता त्यांनी व्यक्त केली.
मुंबई-आग्रा महामार्गावरील एचसीजी मानवता कॅन्सर सेंटर येथे जागतिक महिला दिनानिमित्त निमा न्यू नाशिक या संस्थेतर्फे व एचसीजी मानवता कॅन्सर सेंटरच्या सहकार्याने सत्कार समारंभ पार पडला. यावेळी स्त्रीशक्तीचा सन्मान ‘निमा गौरव पुरस्कार’ देऊन करण्यात आला. या कार्यक्रमास एचसीजी मानवता कॅन्सर सेंटरच्या सीईओ प्रार्थना नगरकर, मेडिकल ऑन्कॉलॉजीस्ट डॉ.श्रृती काटे, निमा न्यू नाशिक संस्थेचे अध्यक्ष डॉ.दीपक चौधरी, सचिव डॉ.प्रशांत वाणी, कोषाध्यक्ष डॉ.परिक्षित खाचणे आदी मान्यवर उपस्थित होते.
डॉ.श्रृती काटे म्हणाल्या, कर्करोगाचे निदान झाल्यानंतर दर्जेदार उपचारासोबत कुटुंबाची साथ मिळणे आवश्यक असते. विशेषतः महिला रुग्णांना त्यांच्या कुटुंबातील सदस्यांनी समजून घेतांना, कर्करोगाविरोधातील लढ्यात भावनिक पाठबळ दिले पाहिजे.
प्रास्ताविकात निमा न्यू नाशिकचे अध्यक्ष डॉ. दीपक चौधरी यांनी संस्थेच्या कार्याची माहिती देतांना, पुरस्कार समारंभ आयोजनामागील भूमिका विशद केली. या कार्यक्रमास महिलांचा उत्स्फूर्त प्रतिसाद मिळाला.
