नाशिक – येथील बांधकाम व्यवसायिक हेमंत पारख यांच्या अपहरण प्रकरणात लक्ष घालून अवघ्या दहा दिवसातच आरोपींना मुद्देमाला सहित पकडून गुन्हेगारांना जेरबंद करणारे नाशिकचे पोलीस आयुक्त अंकुश शिंदे व त्यांच्या सहकाऱ्यांच्या प्रति कृतज्ञता व्यक्त करण्यासाठी क्रेडाई नाशिक मेट्रो तर्फे पोलीस आयुक्त अंकुश शिंदे यांचा हृदय सत्कार करण्यात आला.
क्रेडाई नाशिक मेट्रो तर्फे अध्यक्ष कृणाल पाटील, राष्ट्रीय क्रेडाईच्या घटना समितीचे अध्यक्ष जितूभाई ठक्कर, माजी अध्यक्ष सुरेश अण्णा पाटील,शशी जाधव, दीपक बागड,जयंत भातांब्रेकर, नरेंद्र कुलकर्णी, सचिन बागड, मनोज खिंवसरा, हंसराज देशमुख,ऋषिकेश कोते, अंजन भालोदिया, सतीश मोरे, सागर शहा हे याप्रसंगी उपस्थित होते
यावेळेस बोलताना पोलीस आयुक्त अंकुश शिंदे म्हणाले की, या गुन्ह्याची उकल करण्यामध्ये सर्व सहकाऱ्यांची मोलाची भूमिका होती. नाशिक शहरात सुव्यवस्था नांदावी यासाठी पोलीस प्रशासन पूर्णपणे प्रयत्नशील असून यामध्ये सर्व नागरिकांची भूमिका देखील मोलाची आहे. व्यवसायिकांनी सुरक्षित राहण्यासाठी कोणती काळजी घ्यावयाची आहे अशा प्रकारचे चर्चासत्र क्रेडाई नाशिक मेट्रोच्या सहकार्याने नाशिकच्या सर्व व्यावसायिक संस्थांसाठी लवकरच आयोजित करण्याचा मानसही त्यांनी व्यक्त केला.
आपला ऋणनिर्देश व्यक्त करताना क्रेडाई नाशिक मेट्रोचे अध्यक्ष कृणाल पाटील म्हणाले की, नाशिककरांना सुरक्षित वाटावे असा विश्वास या कारवाईमुळे मिळाला आहे. सुरक्षित शहरासही नेहमीच सर्व स्तरातून पसंती मिळते. पोलीस प्रशासनास क्रेडाई नाशिक मेट्रो तर्फे सर्व सहकार्य करण्यात येईल असेही त्यांनी सांगितले ..
