नाशिक– विजन हॉस्‍पिटल ॲण्ड रिसर्च सेंटरतर्फे व असोसिएशन ऑफ फिजिशियन्‍सच्‍या सहकार्याने कार्डिऑलॉजी अपडेट २०२५ या एक दिवसीय परीषदेचे रविवारी (१४ सप्‍टेंबर) आयोजन केले होते. या परीषदेत देशभरातून आलेल्‍या तज्‍ज्ञ डॉक्‍टरांनी सहभागींना मार्गदर्शन केले. आधुनिक औषधोपचार, ॲन्‍जीओप्‍लास्‍टी, पेसमेकर यासह हृदयविकारांचे व्‍यवस्‍थापनाबाबत सविस्‍तर चर्चा यावेळी करण्यात आली.
हॉटेल रॅडिसन ब्‍ल्‍यू येथे ही परीषद पार पडली. या परीषदेमध्ये पार पडलेल्‍या विविध सत्रांमध्ये तज्‍ज्ञांनी सहभागी होतांना मार्गदर्शन केले. लिपिड असोसिएशन ऑफ इंडियाचे राष्ट्रीय अध्यक्ष डॉ.रमन पुरी म्‍हणाले, वैद्यकीय शास्‍त्रात आतापर्यंत पाश्‍चात्‍य देशांनी ठरविलेल्‍या मानांकनांवर आधारित उपचार केले जात होते. परंतु भारतीयांची जीवनशैलीपासून अनेक गोष्टी विभिन्न आहेत. यासंदर्भात गेल्‍या काही वर्षांमध्ये भरपूर संशोधन झाले आहे. या निष्कर्षांवर आधारित भारतीय मानांकनानुसार उपचार केल्‍यास रुग्‍णांमध्ये त्‍याचे सकारात्‍मक परीणाम दिसतील.
ज्‍येष्ठ हृदयविकार तज्‍ज्ञ डॉ.विनोद विजन यांनी सत्राप्रसंगी मार्गदर्शन करताना मानांकनाचे उपचारातील महत्त्व अधोरेखीत केले. सुधारित निकषांनुसार केलेल्‍या उपचाराचे चांगले परीणाम दिसून येत असल्‍याचे त्‍यांनी निदर्शनात आणून दिले. तसेच सहभागी डॉक्‍टरांचे स्‍वागत करताना परीषदेतून घडणार्या चर्चेमुळे हृदयरोग तज्‍ज्ञांना त्‍यांच्या रुग्‍णांवरील उपचारासाठी सहाय्यता होईल, असा विश्‍वास व्‍यक्‍त केला.
डॉ.विक्रांत विजन यांनी हायपर टेंशनच्‍या वाढत्‍या प्रमाणाबाबत भाष्य केले. आज विविध आजारांवर प्रभावी औषधोपचार उपलब्‍ध झाला आहे. केवळ लक्षणांकडे दुर्लक्ष न करता योग्‍यवेळी उपचार मिळाल्‍यास रुग्‍णांच्‍या जीवाचा धोका टळू शकतो, असे त्‍यांनी नमूद केले.
परीषदेत पहिल्‍या सत्रात मुंबई येथील डॉ. निमित शाह यांनी ॲन्‍जीओप्लास्‍टीतील नवीन तंत्राविषयी माहिती दिली. तसेच रुग्‍णांसाठी कुठल्‍या प्रकारचे औषधोपचार उपयुक्‍त ठरु शकतात, याबाबत माहिती दिली. हैद्राबाद येथील डॉ. सचिन येलगुद्री, मुंबई येथील डॉ.सौरभ देशपांडे यांनी पेसमेकर या विषयावर मार्गदर्शन करताना सर्व आधुनिक घडामोडींची माहिती दिली. नाशिकचे डॉ.गिरीष काळे यांचेही सत्र घेण्यात आले. दरम्‍यान परीषदेनिमित्त गुंतागुंतीच्‍या कोरोनरी ॲन्‍जीओप्‍लास्‍टीवर आधारित कार्यशाळा शनिवारी (१३ सप्‍टेंबर) विजन हॉस्‍पिटल येथे पार पडली. या कार्यशाळेतून सहभागी डॉक्‍टरांना मार्गदर्शन करण्यात आले.
