शासकीय व निमशासकीय कार्यालयात आवारात निवडणूक प्रचारास प्रतिबंध

नाशिक दि.30 : विधानसभा सार्वत्रिक निवडणूक 2019 आदर्श आचार संहिता लागू झाली आहे. सदर निवडणूक कालावधीत कायदा व सुव्यवस्था अबाधित रहावी व निवडणुक प्रक्रिया सुरळीतपणे पार पाडण्यासाठी शासकीय व निमशासकीय कार्यालये, शासकीय व निमशासकीय विश्रामगृहे यांचे आवारामध्ये निवडणूक प्रचारास जिल्हादंडाधिकारी, सूरज मांढरे यांनी नाशिक (ग्रामीण) जिल्हयात 27 ऑक्टोबर 2019 पर्यंत मुंबई पोलिस अधिनियम 1973 चे कलम 144 (1) (2) अन्वये प्रतिबंध घातले आहेत. नाशिक ग्रामीण जिल्हयातील सर्व शासकीय व निमशासकीय कार्यालये व विश्रामगृहे यांचे आवारामध्ये कोणत्याही राजकीय पक्षाने , निवडणूक लढविणाऱ्या उमेदवारांनी किंवा त्यांच्या प्रतिनिधींनी व हितचिंतकांनी सभा घेणे, रॅली काढणे, निवडणूकी संदर्भात पोस्टर्स, बॅनर्स पॅम्प्लेटस, कटआऊटस, होर्डिंग लावणे तसेच निवडणूक विषयक घोषवाक्य लिहिणे किंवा सदरील आवारात निवडणूक विषयक घोषणा देणे किंवा मतदारांना प्रलोभन दाखविणे आणि निवडणूकीच्या कामात बाधा निर्माण होईल अशी कृती करणे किंवा राजकीय कामासाठी सदर आवाराचा वापर करणे या बाबींवर निर्बंध घालत आहेत. सदर आदेशाचा भंग करण्याऱ्यांविरुद्ध भारतीय दंड संहिता 1860 चे कलम 188 अन्वये कारवाई केली जाईल.